Sinulat ni Ven rebo Arigo
Ipatuman na ang ikaduhang hugna sa konstruksyon nga maoy mokumpleto sa pagkatukod sa bag-ong tambalanan sa Loon nga nahimutang sa barangay Canhangdon Occidental.
Gipirmahan di pa dugaysa hepe sa Cong. Natalio Castillo Memorial Hospital nga si Dr. Cyrilda Tallo ang Project Procurement Management Plan 2021 sa kantidad nga P24.9 milyones aron mahuman ang konstruksyon sa maong tambalanan.
Nanghinaut si Tallo nga makabalhin na sila sa bag-ong tambalanan sa sunod tuig aron usab mapahiluna ang mga bag-ong ekipo ubos sa hospital modernization program sa probinsiya.
Ang Cong. Natalio Castillo Memorial Hospital mao usa sa 10 ka mga tambalanan nga gidumala sa kagamhanang probinsiyal.
Gipasalamatan ni Tallo ang Kapitolyo ubos sa liderato ni Gob. Arthur Yap ug Bise Gob. Rene Relampagos sa paghatag sa higayon nga masugdan na ang konstruksyon sa maong ospital.
Natukod ang maong ospital niadtong tuig 1968, ang daan nga tambalanan naapektohan sa kusog nga linog niadtong 2013.
Apan dunay mga parte niini nga gigamit gihapon samtang kumpletohon pa ang bag-ong istruktura ug pasilidad.
Usa sa nakalangay sa proyekto ang pagpili ug pag-angkon sa goberno sa labing luwas ug tukmang dapit para sa bag-ong tambalanan human sa linog pinasikad sa ekspertong pag-tuon ug rekomendasyon.
