Sinulat ni Elvira Bongosia
Mahimong ipahunong ang mga campaign rally nga walay permit, matud pa sa Department of the Interior and Local Government (DILG) niadtong Huwebes, Peb. 10, 2022.
Sa usa ka pahayag, miingon ang tigpamaba sa DILG nga si Jonathan Malaya nga ang mga election officer otorisadong pugngan ang mga nahisgotang aktibidad ilabi na kun wala kini permit.
“Kung wala pong permit ay pwede pong pagbabawalan. Puwede pong mag-utos ang election officer na pigilan ang kahit anumang campaign activity na walang kaukulang permiso,” matud pa ni Malaya.
Matud pa nga ang Comelec campaign committees ang gitahasang mamahala sa paghatag ug mga permit alang sa in-person nga mga aktibidad sa piniliay.
Gilangkoban sila sa usa ka election officer, city health officer, chief of police, military head, ug opisyal sa DILG.
Nipagawas ug pahayag ang DILG kalabot niini human nagsugod na ang campaign period alang sa mga nasudnong kandidato alang sa 2022 eleksyon niadtong Martes, Peb. 8, 2022.
Namahayag ang Philippine National Police (PNP) nga ‘generally peaceful’ ang unang adlaw sa mga kampanya apan adunay mga nahimo pa gihapong pagpanglapas sa health protocol.
