Sinulat ni Elvira Bongosia
Dili mo ubos sa 212 mil ka mga Bol-anon ang mahimong mabakunahan sa sunod nga mga semana, kini human nahidangat dinhi sa Bohol ang kapin sa 35 mil ka vials sa bakuna nga Pfizer niadtong Octubre 16, 2021.
Matud sa taho sa Bohol Inter Agency Task Force (BIATF), nahidangat sa Bohol ang 35,490 ka vials sa bakuna nga Pfizer.
Ang matag vial niining nahisgutang bakuna, may unom ka doses hinungdan nga sa us aka adlaw lamang, nakabaton na dayon ang Bohol ug 212,940 ka doses mga mahimong magamit sa pamakuna niini batok sa Coronavirus disease (Covid).
Kasamtangan na nga ang Bohol nakahatag sa kompleto nga panalipod sa 220,627 ka mga Bol-anon batok sa Covid.
Sa laing bahin, lain nga 201,622 ka mga Bol-anon usab ang nahatagan na sa unang tupokan sa bakuna ug sa sulod sa usa ka buwan, lain na usab nga tupok sa bakuna ang ilang mapaabut aron makakompleto sa panalipod.
Sa taho sa BIATF, kinatibuk-ang 422, 249 na ang bakuna nga nagamit sa mga nahisgutang kalihukan sa pamakuna.
Nahibaw-an usab nga sa paghidangat sa Pfizer niining semanaha, kasamtangan nga miumento ang stockpile sa Bohol sa bakuna, nga karon moabut na sa 776,932 ka doses.
Tumong sa Bohol ang pagpabakuna sa 70% sa kinatibuk-ang populasyon niini, aron makuha sa isla nga lalawigan ang herd immunity.
Sumala sa Philippine Statistics Authority, ang kasamtangan nga populasyon sa Bohol anaa sa 1,394,329, ug kon pangitaon ang 70% niini, kini naa sa 976,031.
Ug sanglit, manginahanglan ang us aka tawo sa duha ka tupokan aron makakuhag kompleto nga panalipod, gikinahanglan sa Bohol ang 1,952,060 ka doses sa bakuna.
Hinuon, kon kwentahon, kon mahuman lang ug tupok ang 776 mil ka bakuna, makab-ot na sa Bohol ang 39% nga mabakunahan sa kinatibuk-ang populasyon niini.
